دودء ُ ربیدگ ء ُ زُبان

image_pdfimage_print
ڈاکٹر ناگمان:
یک راجے یا گْروھے ءِ زِند گْوازینگءِ وَڑء ُ پیماں دود ء ُ رَبیدگ گش اَنت۔ مئے تہءَ بازینےءِ نِزّءَ ایوکءَ پَندولء ُ پاگ یا سَواسء ُ کپاتءِ نام دود ء ُ ربیدگ اِنت۔ بلے چو نہ اِنت۔ دود ء ُربیدگءِ تہہءَ یک راجےءِ سَجّویں زاھِریء ُباتِنی بزاں مادیء ُ پِکری شئے کاینت۔
اِشانی تہ ءَ لہتے چیزّ ھَنچین اَنت کہ وَھدءِ پَجّیءَ یلہ دیگ بنت چو کہ وَھدءَ بلوچانی سَواس تَکُّل ءُ بَزبانی بیتگ اَنت، مَرچاں چَوَٹّ ءُ کوش اَنت۔ پیسرءَ ھِندُستانءَ ”سَتی”ءِ رَسم بیتگ کہ مَرد کہ مُرتگ گُڑا جَنءَ ھم وتا سوتکگ گوں بلے نی اے رسم نیست اِنت۔
دود ء ُ ربیدگءِ لَھتے بَھر ھَنچین اَنت کہ آ ھِجبر یَلہ دیگ نہ بنت۔ آھاں یلہ بہ دئیے، راجءِ جِند مِریت۔ چو کہ زبان اِنت۔ دنیاءِ دْرستیں دود ء ُ ربیدگانی بُنیاد زبان اِنت۔ زُبانے کہ مِریت، تیوگیں ربیدگے، تیوگیں راجے گوں وت بارت گوں۔ زبان راج، رَبیدگ، راجدَپتر۔۔۔ دْرستانی ساہ اِنت۔