مجرم

image_pdfimage_print

رَخشان بلوچ
شام نا آذان خڑک اس ننے اشتافی ٹی شال آ ن تینا شارا بروئی اس۔۔۔
شہید بگٹی روڈآ اسے اِرا رکشہ والا تون ھیت کرین اوفک پاریر دا وختا ننے ہزار گنجی آ بننگ وارا کنپک ۔۔۔
انداڑتون اسہ رکشہ ئس ننا گورا سلیس دا رکشہ نا مونا نواب خیر بخش مری نا فوٹو و تہٹی شہید بگٹی و شہید بالاچ خان مری نا فوٹو ک خلوک اسُر۔۔۔
نن چائسون تینا بلوچ آسے۔۔۔
نن بلوچی ٹی ھیت کرین او بشخندہ ٹی پارے نم تینا بلوچ اُرے ای نمے ہزار گنجی آ دیواولے داوختانما شارآ کن گاڑی مشکل ءِ ۔۔۔
نن پارین نی ننے در اینگ ننا بخت ۔۔۔
نن اوڑتون خوش مجلس مسون ۔۔۔
اوتینا پن ءِ میرک پارے ۔۔۔
میرک پارے کہ نن مری قبیلہ غان تعلق تخنہ ۔۔۔
کوھلوٹی جنگی حالت آن تینا خاہوت تون اوار نیوکاہان شال آ بسونن ۔۔۔
کنا باوہ ہموڑے جنگ اٹ شہید مسنے ۔۔۔
او حوال اٹ دا ہم پارے ای تینا مال تے سودا کریٹ و روزگار کن رکشہ چلیفیوہ ۔۔۔
نن وختس اودے سوج کرین کہ دافوٹوتے نی خلکنس اینو پگہ بنگونن دافتیان ہم سرکارنا کارندہ غاک بد دیرہ دافتے کشرہ ۔۔۔؟
اوپارے راست ءِ کہ ایزدے سنگت ئس پارے کش تاغریب بندغ ا سے اُس ایف سی والاک دے نہ دے ئس سڑک آ بے عزت کرور نے ۔۔۔
ای پاریٹ حیف ءِ کنا بلوچیت آ کہ تینا گدروکا ہستی تا پنے رکھنگ کپر۔۔۔
نی اگہ تینا لمہ نا گُد ءِ کشنگ کیسا تو ای دافتے کشوٹ ۔۔۔
میرک مون مُستی ہزارگنجی کہ روان دا ہم پارے کہ اینو پگہ دشمن ننے وڑ وڑ نا عمل وحربہ تے ٹی خلنگ خوائک ۔۔۔
دُنکہ درو سنگت ئس کنے پارے کہ ایجنسی تا کارندہ غاک اخبار سودا کروک دُکان تا گورا سلرہ ھُریرہ کہ کس اگہ بلوچ قومی تحریک ءِ مونی درو ک اخبار تے خوانک اودے ہم ایجنسی والاک ارفرہ ۔۔۔
او بشخندہ تون پارے دا سا ھیت باز مونی انانے ۔۔۔
گڑاک واضح مننگو۔۔۔

کاریم برجاءِ ۔۔۔
دشمن اخلاقی شکست کننگنے ۔۔۔
داسا ننے ٹی جرأت مرے ۔۔۔
ننے اسہ رکشہ چلیفوک بلوچ آ سینا دا خہ در نظریاتی و پُر فکر مننگ حیران کرے ۔۔۔
نن وختس ہزار گنجی آ رسینگان خفتن نا ازان مننگ اس۔۔۔
میر ک ءِ رخصت کرین ونن اونا پچار ٹی تما ن ۔۔۔
اودامنّان کہ مری و بگٹی قبیلہ نا قربانیک روشنادے امبار پاشو۔۔۔
دافتا ذہن سازی باز مسونے
دا ورنا ناذہن سازی اند ا پائک کہ داڑ ا کس کاریم کرینے کہ میرک داخس تیار ءِ ۔۔۔!
ہفتہ سے آن گڈ اخبار ٹی فوٹو ئس خناٹ۔۔۔
نوشتوک ئس میر ک مری اَرادے غائب کننگا سس اونا تشدد زدہ جُشوک آ جون چلتن نا پاناد آن خننگانے ۔۔۔۔۔۔