لکمیر، تئی بچکند مدام گیر کاینت

image_pdfimage_print
:مہروان کمبر

زمین بس ہما مردماں وتی ھیال ءِ تہا پشت گیجیت کہ آہاں وتی زمین ءِ سرا زندگ بوھگے واب دیستگ. زندگی ءِ سپر ءَ باریں ما چنچو مردماں گوں ڈیک وریں بلے درستیں مردمانی رنگ ءُ دروشم یات نہ بنت بلے اے زندگی ءِ سپر ءَ لہتیں انچیں مردم ہم ڈیک وارتگ کہ آہ پدا ھچبر شموشگ نہ بیتگاں.
انی دیگرے وھد انت کمو دیراں پد دمکاں تہاری مانشانیت ءُ اے ساعت ءَ من وتی بے ڈسیں کوٹھی ءَ تہناہی ءَ نشتگ ءُ ھما سنگت گیر آیگا انت کہ آہ لکمیر نام ءَ زانگ بیت 1 اکتوبر 2016 گورکوپ ءَ زورگریں لشکرے دست ءَ آوار جنئگ بیت انچو کہ مئے چمانی واب انت کہ شپے تہاری ءَ آوار جنئگ بیتگ اتاں.کسان سالیں لکمیر کہ مدام بچکندے آہی ءِ لنٹانی براہ ات ءُ کتابانی شیداہی ءِ ات بانداتے لیڈر ات.لکمیر ءَ ھوار دگہ ھزارانی کچ ءَ بلوچ نوجوان کہ بلوچ کوم ءِ چم ءُ پونز گشگ بیتگ انت ءُ بانداتگیں رہشون آہ قابض ریاست ءَ آوار جتگ انت زندانے میار کتگنت یا کہ شہید کتگنت کارل مارکس گشیت ایردستیں چاگردے ءِ نشتگیں مھلوکے واستہ پہ ببا دیگا دگہ ھچ پشت نکپیت بیدے زندگی ءِ ببا دیگا ءُ جہد کنگ ءَ..
لکمیر جان آواران ءِ دمگ لباچ ءَ یک گلامیں لوگے ءَ ودی بیت وانگے ھاترا شال ءَ روت گڈا مہروانیں شال ءَ کوہ مردار ءِ کوہ ءَ روچ سرا کشیت ءُ اسپیتیں برپانی سرا وتی برانزاں دور دنت گڈا برپانی رنگ گوں شہید مجید جان شہید الی جان کرد شہید ارپان ءِ ھونانی رنگ ءَ سہر بنت ءُ پدا ھزاراں بلوچ پسگانی ھون شال ءِ چکاریں دلبند ءَ چو بشی جمبر ءَ شلنت چلتن ءِ سبزیں دامن ءَ ھونانی شہکورے تچیت ہر دگ ءَ ہر دمک ءُ دراں ھونانی ھارے ملیت گڈا لکمیر جان ءِبے تاھیری گیش بوھان بیت آہ وتی گلامی ءَ ماریت گوں بلوچ راجی تحریک ءَ ھمگرنچ بیت.بلوچ وانندہ گل بی ایس او آزاد شال زون ءِ ممبرے بیت پدا واتر وتی ھلک ءَ کیت آوران زون ءِ زمہ دار بیت پدا آہ اعزازی سی سی ممبر زیرگ بیت. 2015 سیشن ءَ انفارمیشن سیکٹری گچین کنگ بیت پدا مدام گوں کتابانی وانگ ءُ سنگتانی تربیت ءَ گوں دلگوش بیتگ.
من وتی ءُ لکمیر جان ءِ سنگتی ءِ سپرے ترانگ ءَ کپاں کہ اولی رند ءَ زندگی ءَ منا ءُ لکمیر دچار گیتک دیگرے وھدءَ چہ کمو ساری اپریل ءِ گڈی روچاں یک دنز ءُ مجءُ تامور ابیتکیں بیگاہے ءَ من اولی رند ءَ دیست یک زیباہیں بچکندے آہی لنٹاں تالاں بوت.ہمدا چہ منی ءُ آہی سنگتی ءِ سپر منی پرپٹ ءِ پُشت ءَ کندگاں گوں بنگیج بوت.ہمدا چیمن زانت کہ زندگی سنگتی ءِ نام انت ءُ مھرے نام انت.من لکمیر مدام جست کت کہ زندگی چی اے؟جواب داتے کہ زندگی پلے، وشبوے، جلوہے او زندگی بچکندے نام انت ءُ جنزگے ءُ جہد کنگے نام انت.
پدا من اتاں,لکمیر ات, سنگت اتاں, واب اتاں آگہی ءَ دیستگیں واب,وابانی معنا کنگے واستہ سپر ات گران ءُ مشکلیں سپر.ھمے وابانی واستہ نمیرانیں شہید سبا دشتیاری وتی نظم ءِ تہا گشیت…
چنچو واب آگہی ءَ دیستگ من
گوں ھمے واباں زندگاں انگت
واب لوٹنت ارساں ھون بکنت
گوں مرگ ءَ مڈاھے گوں بکن
من پمے ھاترا وتا کشتگ
کنٹگ ءُ پلے زند ءَ رودینتگ
زندمان دردے کہ وڈالیگ انت
راجے ءِ زنداتی ءِ سوالیگ انت
واب باریں کجا برنت زندءَ
گواہ کہ بیگواہ کننت منی جند ءَ
واب من آگہیءَ چاراں باں
کنٹگاں دیدگاں داراں باں
درداں من زندگی ءِ ماراں باں
درد است انت کہ زندگی است انت
واب است انت کی درد آگہ بنت
من مہ باں بلے واب زندگ بنت
زند ءَ جوریں جواب زندگ بنت
مھرے درستیں ھساب زندگ بنت
مہروانیں لکمیر تی آوار جنئگ ءَ پد زندگی نی پیسری رنگ ءَ نہ انت گشے زندگی مرچاں ابیتکی ءِ سازانی کداماں پیڈاتگ نی زندگی دردے ءُ زندگی جیڈھے.امینچو تی دوری ءِ ماہ سال گیش بوھان انت امینچو زیادہ تی گپ, تی بچکند,ءُ تی داتگیں درستیں لیکچر گیر پیداک انت.تی
سوگات کتگیں درستیں کتاب من دوبر ونتگ انت بلے مھروان انگت گوں منا پہمگ نہ بنت نہ اُفتادگان خاک پہمگ بیت نہ کہ تعلیم اور مظلوم عوام.
ماتم ایک عورت کا ءُ سرگزشت اسیر ءَ واناں تی ترانگ گیشتر کاینت گڈا روان اسٹنگے الم وراں..ھما چوک ءِ سرا داں دیراں اُوشتاں کپودرانی ندارگاں چاراں کہ من ءُ تو گڈی رندءَ یک دومی پدا ملگے گشت ءُ اجازت کت…..دیریں ہیالے ءَ کپاں پدا ھمے گماں بیت کہ زندگی وتی گوازینتگیں روچانی سرا جیڈگے نام انت اودا منا…توے….سنگت انت….سپر انت…جالبار انت…پرپٹ ءِ توار انت ءُ دیگر انت مُج ایرنندان انت پدا کندگے ءِ توار بیت زندگی مُجانی ایرنندگینام انت بلے تو مُجانی ایر نندگ ءَ ساری آوار جنگ بیتے.
گوں گونڈیں بالاد ءُ کسانیں عمر ءَ یک انچیں کردے ءِ واہنداتے مے وڈیں نابودءُ بیکردیں سنگتانی واستہ یک سکین اتے انچو کہ اویا بیدر جاھے گشیت,نابودیں کارست دنیاے دراہیں کسمانکاں بہر زیرانت بلے انگت گیشیں (ایکسٹرا) بنت،بلے بقول سنگتے ءِ تو زندگی ءِ اسٹیج ءِ ھما کردار بیتے کہ دومی کردارے واستہ یک راہے گیشینت.پابلو نرودا گشیت، اے سرگوست ءُ یاتانی دپتر ءَ ادا اودا کہ لہتیں جاہ یل دیگ بوتگ انت برے برے اے شموشگ بنت پرچا کہ ھمیشی ءِ نام زندگی انت. بلے مہروان من گشاں ترا چہ رند دگہ ھچ نہ منتگ اے جاور انت جاور بدل بنت بلے کوھنیں یات وتی رنگ ءَ بدل نہ کننت..چوناہاں ما یک انچیں عہدے ءَ زندگ انت ادا لبز ھاموش انت ہر کس گنگ انت ادا توار چست کنوکیں انسان دوستانی زبان آوار جنئگ بیتگاں بس گاروبیگواہیں مردمانی عکس ءُ آہانی یات ءُ ترانگ گپ جننت.