قومی تحریک و ریاست نا مذہبی فریب۔ عابد جان بلوچ

image_pdfimage_print

بلوچ قومی تحریک نا حقیقی دروشم آن مچا دنیا واقف و آگاہ مسونے۔ ریاست تینا مچا زوراکی و طاقت ءِ دوئی کرے ولے ہر جگہ، ہر محاذ و ہر میدان آ اودے بے سرسوبی دوئی بس۔ بلوچ قوم تینا دا آجوئی نا تحریک ءِ ترند کننگ و سرسوبی نا پارہ غا دننگ کن ہر قربانی و سختی سوری تے خوشی ٹی سہنگ ءِ ولے تینا قومی تحریک نا سودابازی ءِ ہچو نرخ اسیا کتانے بلکہ تینا ساہ و جان نا قربانی تسونے ولے تحریک ءِ پدی مننگ التانے۔ دا بلوچ قوم نا نڈر آ ورنا پیر، نیاڑی نرینہ، چنا بھلا ہر غیرت مند و باضمیر نا قربانی تا وسیلہ ءِ کہ اینو پُورا دنیا دا تحریک ءِ اسے حقیقت ئس سرپند مسونے و دنیا نا کہی آجوئی نا تحریک آک دانا تاریخ و قربانی تیان تینا جوزہ غاتے ودیفسہ تینا آجوئی نا تحریک آتے برجا تخانو۔ قوضہ گیر ریاست تینا ناکامی ءِ ہر میدان اٹ خننگ آن بے سُد و گنوکی نا حالت اٹ تینا قوضہ گیری ءِ برجا تخننگ کن ہر وڑ نا گندہ اننگا و انسانیت سوز آ چم آتے دوئی کرے ولے ناکامی آن بیدس ہچ دوئی بتوتے۔


حالات و واقعات و تاریخ گواہ ءِ کہ ریاست تینا مچا چم و پالیسی تے بے سرسوب(ناکام) خننگ آن پد داسہ مذہب نا دروشم اٹ دا تحریک ءِ نزور کننگ نا اسے ناکام او کوشست ئس برجا کرینے۔ ریاست داسہ تینا ناکامی تیان انداخہ فریشان ءِ کہ او اسے چالاکی سیٹی دا سرزمین آ تینا قوضہ گیری ءِ برجا تخننگ کن کسر پٹننگ ءِ۔ شاید تاریخ نا پلو ءِ الیسہ مُست نا قوضہ گیر و سامراج آتا تاریخ ءِ خواننگ ءِ کہ او ہرا ڈول تینا قوضہ گیری و سامراجیت ءِ برجا تخار، ہموتا تاریِخ آن داسہ دا کسر ءِ خنا کہ داسہ کُل کسر آک بند مسُور داسہ مذہب نا پن اٹ مخلوق ءِ دھوکہ ترسہ دا تحریک ءِ نزور کننگ و دنیا ءِ دا نشان تننگ ءِ داڑے ہچو قومی جنگ ئس اف بلکہ داڑے فرقہ و مذہبی آ جنگ آکو۔ ولے بلوچ قوم نا بہادر فرزند آتا قربانی تا خوشبو مچا دنیا ٹی تالان ءِ۔ بلوچ قوم نا ہر ورنا ہر فرزند دا قوضہ گیر ریاست نا چم و چال آتے پُو مسونے۔
دا اسے حقیقت اسے کہ دنیا ٹی زوراک و جابر آ حاکم آک مذہب ءِ زیادہ تر تینا مفاد آتیکن دوئی کرینو۔ دنکہ زرین فاطمہ تینا کتاب’’چاول، امن اور آزادی‘‘ ٹی ویتنام نا تاریخ اٹ نوشتہ کیک ’’ ہر ملک اٹ مذہبی لیڈر آتا کڑد بھاز پیچیدہ مریک، اوتا کڑد مال و زر نا پارہ غان جوڑ مریک‘‘ مونی نوشتہ کیک کہ فرانس نا ویتنام آ قوضہ گیری آن پد دا مذہبی لیڈر آک فرانس نا زیادہ اننگا ٹیکس و بزغر و مزور آتیان زور اٹ کاریم الننگ، اوتا حق آتے پُلنگ، ظلم و زوراکی تا خلاف ہچ ہیت کتوسہ بلکہ فرانس نا زوراک و جابر آ حاکم آتا طرفدار اسُور۔
ریاست دا ڈول نا چم دوئی کرسہ گڑاس دلال ءِ مذہبی جوڑ کرسہ مذہب نا دروشم ترسہ اوتیکن گل و گروپ و جنگجو جوڑ کرسہ بلوچ قوم نا مجاہد آتا مون اٹ سلفنگ ءِ، آجوئی نا تحریک ءِ نزور کننگ کن مچا بلوچستان اٹ دا وحشی درندہ غاتے تالان کننگ ءِ، داتے مذہب نا پن ترسہ بلوچ قومی تحریک نا بہادر آ سپاہی و آجوئی نا دوستخواہ تے شہید کننگ او۔ ریاست دا سمجھانے کہ دا ڈول اٹ دا تحریک ءِ پد بٹیوہ ولے داخہ گنوک مسونے اودے دا خبر اف کہ دنیا ٹی ہرا تحریک اٹ دتر شولننگانے ہمو دتر تا خوشبو مچا قوم نا ورنا تے بش کیک۔ دنکہ پامدار سینا قول ءِ کہ اسے خاچوک او بندغ سیکن دیر نا پُوڑی ئس درکار مریک ولے خاچوکو قوم سیکن شہید آتا دتر نا درکار ءِ۔ داسہ بلوچ قوم نا شہید آتا قربانی تا سوب آن مچا بلوچ قوم تینا حق و دھرتی نا شعور ءِ دوئی کرینو۔
مچا دنیا نا مون آ ریاست نا گندہ اننگا دروشم ظاہر مس، دنیا خناتے اندا ریاست مذہبی مسلح گل و طالبان تے جوڑ کرسہ ٹریننگ ترسہ تینا ہمسایہ ملک آتیا رائی کرے ہرانا سوب آن بھلو انسانیت سینا دتر شولننگا و داسکان شولننگسائے۔ شاطر آ ریاست دنیا ءِ دھوکہ تننگ نا کوشست ئس کرے کہ اسے پارہ غان مذہبی شدت پسند جوڑ کرسہ ایلو ملک آتیا رائی کیو و ایلو پارہ غان دنیا ءِ دا پاوہ کہ دا ریاست ہم مذہبی شدت پسند آتا دو آن نسخان ارفنگ ءِ ہراڑان دنیا اودے فنڈ ایتے۔ ولے مچا دنیا دا نا دا فریب آ دروشم ءِ پُو مس۔ منہ دے مست امریکہ نا صدر ڈونلڈ ٹرمپ واضح اننگا لوز آتیٹ پارے کہ پاکستان مذہبی شدت پسند جوڑ کننگ ءِ، اوتے جاگہ تسونے و اوتے ٹریننگ و اسلحہ ہروڑ نا سہولت تننگ ءِ۔ منہ پین ہم ملک وختی دا وڑ ریاست نا گندہ اننگا دروشم ءِ پاش کریر۔
بلوچ قومی تحریک ءِ نزور(کمزور) کننگ کن مالو منہ زرخرید سردار نواب و میر و معتبر دوئی کرے، داڑان ناکامی آن پد داسہ اندا دلال آتے مذہبی دروشم ترسہ مذہب نا پن اٹ جنگ ءِ برجا کرفنگ کن مچا بلوچستان اٹ تالان کرینتا۔ ریاست اندا مذہبی گروپ آتا باسک آتے خصوصی ٹریننگ، اسلحہ، فنڈ و ہروڑ نا کمک تننگ ءِ۔ دا مذہبی مسلح تنظیم آتا مسخت بلوچ قومی تحیرک ءِ نزور کننگ نا ءِ۔ ولے بلوچ قوم داسہ تینا شہید و زانتکار و دانشور و مذہبی آ سکالر آتا کمک اٹ انداخہ شعور دوئی کرینے داسہ ہچو دھوکہ باز ئس دا قوم ءِ دھوکہ تننگ کپک۔ بلوچ قوم نا فرزند آتا شعور انداخہ گشادہ ءِ کہ اگہ دا تحریک کن اوتا ساہ و جان تا قربانی درکار مس او قربانی کیرہ تا۔
بلوچ قوم نا ورنا تے بے گواہ کننگ، استاد آتے شہید کننگ، قومی تحریک نا سپاہی تا ہنکین تیا جلہو کننگ،خونی آپریش تیٹی چنا نیاڑی تے شہید کننگ و اوراتیان قیمتی آ گڑا تے دزنگ، آجوئی نا بابت خولیس تالان کننگ اندا مذہبی دلال آک داتے تینا مسخت جوڑ کرینو۔ ولے داتو کائناتی او سچائی اسے کہ تحریک آک و قوم آک شہید مننگ آن ختم مفسہ بلکہ پین زیات مریرہ، تحریک آک پین سرسوبی آن خڑک مریرہ۔
دا حالت آتیٹ بلوچ قوم نا ورنا و با شعور آ خواجہ و مذہبی آ لیڈر آتیا دا زمہ واری لازمی مریک کہ او مذہبی حوالہ اٹ بلوچ قوم ءِ انداخہ شعور و آگاہی ایتر کہ ریاست نا دا مذہبی چمچہ آتا دو آن بے و قوف مفس۔ داسہ بلوچستان نا کہی اندونو علاقہ اریر کہ ہراڑے اندا مذہبی ریاست نا بندغ آک تینا ظلم ءِ برجا تخانو۔ ریاست اسے پارہ غا ظلم ءِ برجا تخانے ایلو پارہ غا مذہب ءِ غلط دوئی کرسہ بلوچ قوم نا گڑاس سادہ، ناخوانندہ غا بندغ آتے دھوکہ تننگ ءِ۔ مذہب نا پن اٹ انداخہ بے وقوفی و جاہلیت ودی کننگانے کہ گڑاس مخلوق تینا حق آتے ہلننگ ءِ ہم گناہ سرپند مریرہ۔مطلب اوتے اندا وڑ ریاست تینا مذہبی دلال آتا کمک آت تارمئی ٹی تخانے کہ بس امر حالت مرے انسان نا ذی آ اخہ ظلم مرے بس انسان عبادت کے، پین ہچ ہیت کپ نا کہ جہد کے۔ اگہ ہیت کرے یا دو ارفے اندن چاہ کہ گناہ کبیرہ ئس کرے۔ دا ڈول ریاست بلوچستان اٹ بلوچ قومی تحریک ءِ نزور کننگ نا کوشست ءِ کننگ ءِ۔
ولے دا دھرئی نا جنگ مچا دھرتی نا فرزند آتے بش کرینے و مچا دنیا دا نا حقیقت آن واقف ءِ کہ بلوچستان نا الس مذہب آن انکاری اف، داڑے ہر فرقہ، ہر مذہب نا پیروکار آتے تینا مذہب نا وڑ و ڈول زند تیر کننگ نا مکمل آجوئی رسینگانے۔ ہچو مذہبی او جنگ و اڑوجنجال ئس اف بلکہ داڑے بلوچ قوم نا تینا دھرتی نا آجوئی نا جنگ ءِ۔ داڑے حاکم محکوم نا جنگ ءِ، مچا بلوچستان نا رہینگو کا تا جنگ ءِ ہراکے تینا دھرتی بلوچستان ءِ آجو خوارہ۔ دا تحریک ہر حوالہ اٹ سوسوب مسونے، ہمودے مُر اف کہ بلوچستان دنیا نا مون آ اسے آزاد ریاست ئس درست مرے۔۔۔۔۔۔ انشاء اللہ۔