شہید شکور بلوچ

image_pdfimage_print

نوشت۔ عابد جان بلوچ

بلوچستان اٹ قومی جہد کن مچا دھرتی نا اسے دُنو علاقہ، کونہ ئس سلتانے کہ ہراڑے دا دھرتی نا بہادر سینا دتر وہیتنے۔ مچا دھرتی نا ہر کونہ غان بہادر آ سپاہیک، پیر ورنا، نیاڑی نرینہ، چنا بھلا، امیر و غریب قومی جہد اٹ بشخ الیسہ ہر وڑنا قربانی تسونے و تننگو۔دھرتی نا ہر علاقہ ٹی شہید آتا دتر وہانے۔ لاش آتا خوشبو سر مسونے، سرمچار آتا کوکار بے چینی ودی کرینے، زانتکار آتا لوز آک بیداری ودی کرینو، شاعر آتا شعر آک جوزہ ودی کرینو۔ بلوچ قوم اسے تاریخی او جہد ئس برجا تخیسہ اندُنو قربانی تا سمندر ئس تالان کرینو ہراتا مثال قربانی تا مثال دنیا نا تاریخ اٹ بھاز کم ملّیک۔

بی ایس او آزاد نا باشعور آ ورناک اسے ترندو جوزہ سیٹی تینا بنیادی آ حق آتیکن سیاسی ڈول اٹ کوکار کننگو۔ اندا کوکار نا جرم اٹ کہی ورنا تے قوضہ گیر ریاست نا بزدل آ جلہو آتیٹ شہید کریر و کہی تے بے گواہ کرسہ تینا ٹارچر سیل آتیٹی انسانیت نا حد آن پار اننگا خلنگ و تشدد نا گواچی کننگ او۔

شہید شکور بلوچ ننا خوانندہ گل نا ہمو ورنا ئس ہراکے ننے آن مسے سال مست جتا مس ولے اونا نظریہ، فکر و جہد داسکان بی ایس او آزاد نا ورناتیٹی سلوکے، یقینا دا جہد مزل نا سرمننگ اسکان برجا سلیک۔ 18اگست 2013ء نا بد بخت اننگا دے نا دا ورنا ءِ جسمانی حوالہ اٹ ننے آن جتا کرے۔ بزدل ریاست نا فوجیک دا ورنا نا نظریہ فکر ءِ تینکن خاخر ئس سرپد مریسہ دا ورنا نا کمزور آ جون آ سم کاری کریسہ شہید کریر ولے دا تو کائنائی او حقیقت ئسے کہ اسے نظریہ فکر سینا مسافر ہچ دنیا نا تاریخ آن پیش تمپک او اسے زندہ او پن ئس کٹک، یقینا اینو شہید شکور بلوچ ءِ مسے سال نا جتائی آن پد ہم اونا پن داسکان بلوچ قوم نا تاریخ اٹ زندہ ءِ۔ شہید شکور دنیا ءِ دا نشان تس کہ دا دھرتی نا ورناک ہر وڑ نا قربانی تننگ کن تیار او ولے دشمن ریاست نا تینا سرزمین آ قوٖضہ ءِ سگیپاسہ۔ شہید شکور شہادت ءِ قبول کرے ولے تینا دھرتی نا آجوئی نا جہد آن اسے انچ ئس ہم پد متو۔ اگست نا تُو ئس غیر فطری ریاست نا وجودیت نا تاریخ ہراڑے مچا بلوچستان اٹ سوگ نا دے اٹ یات مننگ ئس ہموڑے ریاست نا فوجیک ہڑی آ کچک آنبار مچا بلوچسان اٹ اسے خونی او آپریشن ئس برجا تخا۔ 18اگست 2013ء نا دے شال اٹ سریاب روڈ آ ریاست نا فوجیک دا باشعور آ ورنا ءِ شہید کریسہ اندا سمجھا کہ بس اسے باشعور ئس بی ایس او آزاد نا ورنا تا نیام آن جتا مس، داسہ دا گل تینا جہد آن پدی مریک ولے مچا دنیا دا حقیقت آن واقف مس کہ قربانیک دا جہد ءِ پین ترند کریرہ۔ ہر تحریک و جہد اٹ ورنا تا دتر شولننگانے ہمو تحریک ضرور سرسوب مسونے۔

بی ایس او آزاد نا زار آ ورناک شہید مسور و ہزار آک داسکان دشمن نا ٹارچر سیل آتیٹی انسانیت سوز اذیت آتے سہیسہ دشمن ءِ ہر پارہ غان بے سرسوب کرینو۔ داسہ دشمن جعلی مقابلہ غاتیٹی ورناتے شہید کننگ ءِ۔ دشمن تینا پر گندہ اننگا پالیسی تے بلوچ قوم آ آزمائفے لوے بلوچستان نا غیرت مند نڈر آ اولاد آک ہر قربانی ءِ خوشی ٹی قبول کریر ولے دشمن نا قوضہ گیری ءِ منیتانو۔

شہید شکور بلوچ بلوچستان نا علاقہ مستونگ اٹ ہمو دور اٹ خنتے پٹیا ہرا وخت آ غلامی نا زند و بلوچ قوم نا بے وسی، ایڑ ایلم و لمہ غاتا عزت آتا رکھ اکن جہد برجا ئس۔ شہید ہرا وخت تینا حقیقی آ علم و تعلیم آن شعور دوئی کرے و ہمو وخت آن اونا زند نا آسودگی، آرام نا ساعت آک ایسر کرسہ ہمو وخت آن دھرتی بلوچستان نا جہد کروکا ورنا تا گل اٹ اوار مس۔ بی ایس او آزاد نا پلیٹ فارم آ دھرتی نا جہد ءِ برجا کرے۔ ورناتا اسے بھلو گل ئسے باشعور کرسہ بی ایس او آزاد نا پلیٹ فارم آ جہد ءِ برجا تخننگ کن اوار کرے۔ بلوچستان یونیورسٹی ٹی ورنا تا سرکل اٹی تینا بھلا سوچ و فکری آ لوز آتے تالان کرسہ ورناتے بروکا وخت  کن پوسکنو پالیسی جوڑ کننگ، تعلیمی میدان اٹ تینا جہد ءِ مونی دننگ و تینا گل بی ایس او آزاد نا کلہو ءِ مچا بلوچستان نا ہر ورنا خوانندہ اسکان سر کننگ کن پاریکہ۔ دنیا نا ایلو تحریک آتیٹی ورنا خوانندہ گل آتا کڑدار و تاریخ ءِ مچا ورنا تا مون آ تالان کریکہ۔

شہید شکور بلوچ ورنا تے ہمو کسر نا پارے ہراکے انسان ءِ اونا جتائی آن پد ہم زند سلفیک۔ دھرتی نا دا ورنا نا قربانی دشمن ءِ ہمو خلیسے تس ہراڑان ریاست داسکان دا گل نا ہر ورنا غان خوف کننگ ءِ۔ دا سال اٹ ہم بی ایس او نا کہی ورناک دشمن ریاست نا بزدل آ جلہو آتیان شہادت نا جام ءِ نوش کریر۔ ولے بی ایس او آزاد نا ورنا سوغند ارفینو کہ زند نا آخری کو ساہ اسکان قوضہ گیر تون قلم ناکمک و تینا کوکار نا جنگ ءِ برجا تخینہ۔ دا جہد مزل نا سر مننگ اسکان برجا سلیک۔