شونگال

image_pdfimage_print

:ادارہ
اے گپ تچک اِنت کہ مرچیگیں زمانگ ءَ راجاں ایر دست کنگ ءِ واستہ تھنا زور ءُ زوراکی بس نہ اِنت، ایشی ءَ ھوار ایردستیں راجانی زبان، دود ءُ ربیدگ ءُ چاگردی اسٹرکچرءَ بدل کنگءُ آھانی زمین ءِ ھد ءُ سیمسرانی پْرشت ءُ پْروش ءُ بدلیءُ سدلی ءِ وڑیں پندل سازگ بنت۔ دنیا ءِ بازیں ملکاں ایشیءِدرور است کہ ایردستیں راجانی زبانانی سرءَ بندش جنئگ بیتگ۔ یک درورے ترکی اِنت کہ اودءَ یک وھدے کردانی زبان ءِ سرءَ پابندی بوتگ۔ یک قومے ءِ کہ زبان گار کنگ بہ بیت گڈا آ راج وتی پجار ءَ گار کنت۔ مرچی ما گندگ ءَ ایں کہ بلوچی ءُ براھوائی زبان ءِ سرءَ نہ ایوک ءَ غیر اعلانیہ پابندی جنئگ بوتگ، بلکیں زبانانی فرق ءِ نام ءَ بلوچ ءَ پروش دیگءِ نیتءَ بھر ءُ بانگ ءِ پالیسی ھم سازگ بوھگ ءَ اِنت۔ دیر اِنت کہ پاکستان اے پروپگنڈہءَ تالان کنگءِ جھدءَ اِنت کہ براھوئی ءُ بلوچی یکیں قوم ءِ زبان نہ اَنت۔ دو جتائیں راج اَنت۔ بلئے اے یک راجدپتری راستی یے کہ بلوچی ءُ براھوائی ءَ گپ جنوکیں مردم ھزاراں سالاں چہ یکیں زمین ءِ واھند اَنت، ءُ پہ ھمے زمین ءَ ھواری ءَ وتی ساہ ءُ سر اِش ندْر کتگ اَنت۔ ھمے رنگءَ جدگالی ءُ سرائیکی زباناں گپ جنوکیں مردماں پاکستان چہ بلوچ راج ءَ سندگ لوٹیت۔
قومانی بھر ءُ بانگ کنگ ءِ پندل سازگ ھم جنگ ءِ بھرے۔ بلوچ راج ءَ را اے گپّ الّم ءَ سرپد بوھگی اِنت کہ پاکستان ءِ رسانکدر ءُ زانتکار بلوچ راجدپتر ءُ بلوچ زمین ءِ ھد ءُ سیمسراں دروگیں رنگے ءَ پیش دار اَنت۔ داں کہ بلوچ راج وت واجہ نہ بوتگ پاکستانءِ زوراکی بلوچ ءِ ھلاپ ءَ ھمے رنگ ءَ برجاہ بیت۔
بلوچ دانشور ءُ زانتکار باید اِنت کہ چہ مزنیں تاوانےءَ پیش اے پندلانی پدّر کنگ ءِ جُھدءَ بہ کن اَنت، چیا کہ آپ اگاں چہ سرءَ گوْست پدا دستاں سرءَ کنگءَ پائدگ نیست۔ مرچی بلوچ مھلوک تیار اِنت، انوگیں آجوئی جنگ ءَ مھلوک ءِ تہءَ اے زانت ءُ آگھی آؤرتگ کہ مھلوکءِ گیشتریں بھر پاکستان ءِ نیمگ ءَ چہ تالان بوتگیں گپّاں پندل سرپد بیت، بلے ریاستی میڈیا رنگے نہ رنگے ءَ مردمانی تہ ءَ ھمے بھرءُ بانگ ءَ پیداک کنگ ءَ دلگوش اِنت۔ زوراکیں دژمن ءِ دیم ءَ یک گروھے داشت نہ کنت۔ دانکہ مھلوک ءِ تہ ءَ اتکگیں آگاھی یک دلجمیں پلیٹ فارمے ءِ کمکءَ چہ متحرک کنگ مہ بیت۔
بی ایس او آزاد ءَ مدام ھمے گپّ ءِ سرءَ زور داتگ کہ بلوچ نبشتہ کار، زانتکار ءُ کواس، وتی کردءَ پارٹی پلیٹ فارمءِ سر ءَ دیمءَ بہ بر اَنت۔ پرچا کہ بلوچءَ چہ گلامیءُ زوراکیءَ رکینوک تھنا بلوچءِ راجی گل اَنت۔ بلوچ نبشتہ کارانی بنکی ذمہ واری اِنت کہ راجی جُنز ءُ راجی پجار ءِ دیم ءَ استیں جیڑھاں مھلوکءِ دیم ءَ آرگ ءِ واستہ وتی کردءَ پیلو بہ کن اَنت۔