شونگال: ادارہ

image_pdfimage_print

 بلوچ اسٹوڈنٹس آرگنائزیشن چہ وتی ٹھشتءِ اولی روچ ءَ بگر داں روچ ء مروچی بلوچ چاگرد ءِ تہ ءَ وتی علمی ءُ سیاسی کرد ءَ پیلو کنان ءُ پیداک اِنت ۔ بلوچ چاگرد ءَ چہ مذھبی شدت پسندی ءَ رکینگ بہ بیت یا کہ چہ قبائلی نظام ءِ سیاسی جیڑھاں مھلوک ءَ سرپد کنگ، بی ایس او ءَ ھرچ وھد ءَ اے گرانیں ڈُبہ وتی کوپگاں زرتگ ءُ پہ راجی باندات ءَ تاوان باریں روایتانی پروش دئیگ ءَ مدام جھد کتگ ءُ کنگ ءَ اِنت۔ اے پدّریں راستی یے کہ قبائلی نظام ءِ پشت ءَ ریاستی مشینری اوشتوک اِنت ءُ مذھبی شدت پسندی تالان کنگ ریاست ءِ کاؤنٹر انسرجنسی پالیسی ءِ بھر اِنت۔ پمشکہ اے جیڑھانی بابت ءَ لس مھلوک ءُ ھاس بلوچ ورناھاں سِنچ ءُ سرپدی دئیگ ءِ جُرم ءَ ریاست ءُ آئی ءِ کاسگ چٹّاں بی ایس او ءِ ھلاپ ءَ وڑ وڑیں پندل ساز اِتگ۔ برے بی ایس او ءِ باسک مذھب دشمن ءِ نام دئیگ بوتگ اَنت ءُ برے دگہ بھتام جتگ اَنت۔ تاریخ ءِ تہ ءَ بی ایس او ءِ بھر ءُ بانگ ءِ سوب ھم ھمے بیتگ کہ بلوچ ورناہ شِنگ ءُ شانگ بہ بنت ءُ چہ مادنیں راہ ءَ گسر بہ بنت۔بلئے مرچی زمینی راستی مئے دیم ءَ پدر اَنت۔ ما گندگ ءَ ایں کہ پاکستان وتی سازتگیں پندلاں سوبین نہ بوتگ۔ چیا کہ بی ایس او ءِ ارواہ مرچی بی ایس او آزاد ءِ رنگ ءَ زندگ اِنت۔ بلوچ چاگرد ءُ ھاس ورناھانی تہ ءَ آگاھی ءُ سنچ ودی کنگ ءِ جھد ءَ بی ایس او آزاد ءِ کرد چہ کس ءَ اندیم نہ اِنت۔ پمشکہ زوراک بی ایس او آزاد ءِ سرءَ پابندی جنئگ ءَ لاچار بیتگ، ءُ سدانی ھساب ءَ بی ایس او آزاد ءِ لیڈر ءُ باسک گار ءُ بیگواہ ءِے کتگ اَنت۔ ءُ دگہ دو امینچو شھید ءِے کتگ۔ بلئے ورناہ اے کلیں جنجالاں راجی جُنز ءِ بھر سرپد بنت ءُ اے سرجمیں زوراکیاں چہ پد ھم بی ایس او آزاد ءِ سنگت گامے پُشت ءَ نہ کِنز اتگ اَنت۔
بلوچستان ءِ لس مھلوک شری ءَ سرپد اِنت کہ بی ایس او آزاد یک پر ایمنیں گلے کہ آئی ءِ کار مدام سیاسی باوست، علمی سرکل ءُ کتاب وانگ ءُ وانینگ بوتگ۔ بی ایس او آزاد چہ اولی روچ ءَ بلوچستان ءِ پدمنتگیں ھند ءُ دمگاں کتابجاہ جوڑ کنگ ءَ بگر داں لوگاں سیاسی میگزین سر کنگ ءِ جھد ءَ گلائیش اِنت۔ بلئے استان چہ بی ایس او آزاد ءِ اے کاراں ھچبر وش نہ بیتگ۔ آئی ءِ واھگِ اِنت کہ آ بے تواری ءَ بلوچ سرڈگار ءِ مال ءُ مڈیاں بہ پُل ایت۔ وتی ھمے واھگ ءِ سرجم کنگ ءِ ھاتر ءَ پاکستان ءَ بی ایس او آزاد ءِ باسکانی واستہ وڑ وڑیں جیڑہ ودی کنگ ءِ جھد کتگ ۔ یک نیمگے آیانی کُشت ءُ کوش بندات کتگ ءُ دومی نیمگ ءَ گل ءِ تاک آزاد، گروک ءُ سگار ءَ ھوار ایدگہ سیاسی گلانی لیٹریچرانی سرءَ بندش جنئگ ھمے یکیں پالیسیِ اِنت۔
بلوچ اسٹوڈنٹس آرگنائزیشن آزاد ءِ جھد اِنت کہ بلوچ ورناہ ءُ لس مھلوک ءَ چہ دنیا ءِ بدل بوؤکیں سیاسی جاور اں سرپد بہ کنتءُ گلامی ءِ سیاسی، معاشی ءُ چاگردی جیڑھانی سنچ ءَ بہ دنت۔۔ ھمے در گت ءَ تنظیم وتی وس ءُ واک ءِ ھساب ءَ کار ءَ اِنت ۔ زور گریں استان ھم وتی ھزار داب ءِ مکراں گوں بلوچ راجی جُنز ءِ دیم ءَ دارگ ءِ جھد ءَ دزگلائیش اِنت۔ بلئے اے راستی ءَ کس بدل کت نہ کنت کہ زوراکی پہ مدامی برجاہ بوت نہ کنت ، شرط ایش اِنت کہ قوم ھچ وڑیں قربانی ءِ دئیگ ءَ چک ءُ پد مہ بنت۔
بی ایس او آزاد ءِ ترجمان سگار ءِ بیستمی تاک شمئے دست ءَ اِنت۔ اے تاک ءِ تہ ءَ بلوچستان ءَ ھوارسرجمیں دنیا ءِ تہ ءَ بوتگیں واقعہ آنی تجزیہ بلوچی، براہوئی، اردو ءُ انگلش زبان ءَ کنگ بوتگ اَنت کہ ھرچ پڑ ءِ مردمانی واستہ پہ سرپدی ءَ آسانی بہ بیت۔ ما اُمیت کن ایں کہ سگار ءِ وانگ ءَ پد شما وتی سر ءُ سوجاں مارا ای میل کن اِت۔